ضيف الله بن فهد العضياني العتيبي

قصيدة للشاعر ضيف الله بن فهد العضياني العتيبي من مرثية طويلة في المرحوم فهد بن منير بن فضا العضياني العتيبي يرحمه الله :

يا عين هلي دمعك اليوم هليه = خليه يحرق ناظري معء خدودي

على الفقيد اللي نحبه ونغليه = عنا رحل في ساعةٍ ما تعودي

أبكيه من غيره من الناس نبكيه =أخويه اللي من سلايل جدودي

لو البكا ما هو علينا مضوّيه = لكنّ دمع العين بيّح سدودي

محدٍ يلوم اللي فقد قرب غاليه = فرقاً على قلبي تشب الوقودي

لو انها بالمال والروح نفديه = مير القدر ماله بدربه صدودي

وما قدّر الوالي على العبد راضيه = والموت حق وكلنا له ورودي

من يامن الدنيا على اللي تسويه = وابيتنا للي طاح فيه العمودي

لو نرفعه ماننهضه مثل راعيه = كلٍ يبي مثله وفعله يكودي

طويل باع وناع محدٍ يجاريه = ما أخطاه في دنياه عين الحسودي

بعض الرجال جمال محدٍ يحاليه = لو حطّ في مبركءه هرش وقعودي

واخويه اللي ما توّصف مباديه = على النقا ياللي تداوي الكبودي

واخويه اللي شارة الحر تكفيه = عن المواجب ما يحب الصدودي

واخويه اللي ماتبيّت نواعيه = هنيكم ياللي بوسط اللحودي

جاوركم اللي جارته تفتخر فيه = ستر القصيره عن حماها يذودي

يا قل سيّاته ومكثر حسانيه = من جُود ربي بالمكارم يجودي

* ضيف الله بن فهد العضياني العتيبي